तेल्हारा ता.प्रतिनिधी: नंदकिशोर नागपुरे
हिंदू नववर्षाचे स्वागत आणि साडेतीन मुहूर्तापैकी एक असलेल्या गुढीपाडव्याचा सण दानापूर व परिसरातील गावांमध्ये अत्यंत उत्साहात आणि पारंपरिक पद्धतीने साजरा करण्यात आला. चैत्राच्या पहिल्या दिवशी घरोघरी उभारलेल्या गुढ्या आणि फुलांच्या माळांनी संपूर्ण परिसर भक्तिमय झाला होता.
पारंपरिक पद्धतीने पूजन
गुरुवारी पहाटेपासूनच दानापूर येथील नागरिकांनी आपल्या घराची स्वच्छता करून अंगणात सडा-रांगोळी काढली. घराच्या प्रवेशद्वारावर आंब्याची पाने आणि झेंडूच्या फुलांचे तोरण बांधून नववर्षाचे स्वागत केले. बांबूच्या काठीला रेशमी वस्त्र, कडुनिंबाची डहाळी, गाठी आणि चांदीचा किंवा तांब्याचा तांब्या लावून विधिवत गुढी उभारण्यात आली.
परिसरात चैतन्याचे वातावरण
दानापूरसह जवळच असलेल्या सोगोडा, वारी भैरवगड, वारखेड, सौदळा,हिवरखेड रोडवरील वस्त्यांमध्येही पाडव्याचा उत्साह दिसून आला. अबालवृद्धांनी नवीन कपडे परिधान करून एकमेकांना नववर्षाच्या शुभेच्छा दिल्या. कडुनिंबाची पाने आणि साखर असे मिश्रण प्रसाद म्हणून वाटून आरोग्यदायी वर्षाची कामना करण्यात आली. शेतकरी वर्गामध्येही या सणाचे विशेष महत्त्व दिसून आले, अनेकांनी आपल्या कृषी अवजारांचे पूजन करून नवीन हंगामासाठी आशीर्वाद मागितले.
बाजारात लगबग
सणानिमित्त दानापूर येथील बाजारपेठेत फुले, हार, गाठी आणि फळांची मोठी खरेदी-विक्री झाली. दुपारच्या वेळी घराघरांतून पुरणपोळी आणि श्रीखंड-पुरीचा सुवास दरवळत होता. सायंकाळी गुढी उतरवून नववर्षाचा हा आनंद द्विगुणित करण्यात आला.
प्रतिक्रिया.
गुढीपाडवा हा आपल्या संस्कृतीचा कणा आहे. दानापुरात दरवर्षीप्रमाणे यंदाही सर्व नागरिकांनी गुण्यागोविंदाने हा सण साजरा केला, हे पाहून आनंद होतो.”
महादेवराव वानखडे ,
माजी.सरपंच दानापुर
